अलाने–दरखेडा फाटा येथे भीषण अपघात; दोघांचा जागीच मृत्यू, तिघे गंभीर धुळे खाजगी रुग्णालयात उपचार सुरु 
✍️शिंदखेडा माझा संपादक यादवराव सावंत
शिंदखेडा तालुक्यातील शिंदखेडा – चिमठाणे राज्य मार्ग 12 वर अलाने–दरखेडा फाटा दरम्यान रविवारी दुपारी भीषण अपघात घडून दोन जणांचा जागीच मृत्यू झाला, तर तिघे जण गंभीर जखमी झाले आहेत.
मिळालेल्या माहितीनुसार, दुपारी सुमारे ३ वाजेच्या सुमारास चिमठाणेकडून येणारी अल्टो कार (क्र. MH23 Y 0910) ही चालकाचे नियंत्रण सुटल्याने रॉंग साईडने समोर आली. त्याचवेळी शिंदखेड्याकडून चिमठाणेकडे जाणाऱ्या मोटारसायकल (क्र. MH18 CD 3260) ला कारने जोरदार धडक दिली. हा अपघात इतका भीषण होता की मोटारसायकलवरील दोघांचा जागीच मृत्यू झाला.
या अपघातात दिवी येथील हेमंत दिलीप गिरासे (वय २८) व दिलीपसिंग भगवानसिंग गिरासे (वय ६५) यांचा जागीच मृत्यू झाला. त्यांच्यासोबत असलेले भीमसिंग हरसिंग गिरासे हे गंभीर जखमी झाले आहेत. तसेच कारमधील दोघे प्रवासीही गंभीर जखमी झाले असून एकूण तिघांवर धुळे येथील खाजगी रुग्णालयात उपचार सुरू आहेत.
अपघातानंतर परिसरातील नागरिकांनी तत्काळ घटनास्थळी धाव घेत जखमींना उपचारासाठी रुग्णालयात हलवले. संबंधित कार साक्री तालुक्यातील असल्याची प्राथमिक माहिती मिळाली आहे.
या घटनेमुळे परिसरात हळहळ व्यक्त होत असून अलाने फाट्यावर गतिरोधकाची मागणी अनेक दिवसांपासून करण्यात येत आहे मात्र सार्वजनिक बांधकाम विभाग अद्याप येथे गतिरोधक टाकत नसल्याने नागरिकांनी नाराजी व्यक्त केली आहे असून पुढील तपास पोलिसांकडून सुरू आहे.
