जिद्दीला कष्टाची जोड; पितृछत्र हरपलेल्या ‘कढरे’च्या योगेशची पुणे पोलीस दलात झेप! 👉गावातील तरुणाकडून प्रतिकूल परिस्थितीवर मात; परिसरातून कौतुकाचा वर्षाव
✍️ शिंदखेडा माझा (संपादक यादवराव सावंत ):
माणसामध्ये काहीतरी करून दाखवण्याची जिद्द आणि त्याला अतोनात कष्टाची जोड असेल, तर गरिबी कधीही यशाच्या आड येत नाही, हे साक्री तालुक्यातील कढरे येथील तरुण योगेश राजेंद्र गिरासे याने सिद्ध करून दाखवले आहे. अत्यंत हलाखीच्या परिस्थितीवर मात करत योगेशची पुणे पोलीस दलात निवड झाली असून, त्याच्या या यशाने संपूर्ण गावाचा नावलौकिक वाढला आहे.वडिलांचे छत्र हरपले, पण जिद्द कायम योगेशचा इथपर्यंतचा प्रवास अत्यंत संघर्षाचा राहिला आहे. लहानपणीच वडिलांचे निधन झाल्याने कुटुंबाची सर्व जबाबदारी आईवर आली होती. मात्र, अशा कठीण काळात आई कविता गिरासे, आजोबा मुकुंदा नवलसिंग गिरासे, आजी रत्नाबाई गिरासे आणि मामा ज्ञानेश्वर गिरासे यांनी त्याला खंबीर साथ दिली. कुटुंबाने मजुरी करून योगेशला शिक्षणासाठी प्रोत्साहित केले. शिक्षणासोबतच शेतात राबला
योगेशचे प्राथमिक शिक्षण कढरे येथे, तर माध्यमिक व उच्च माध्यमिक शिक्षण वडाळी (ता. शिंदखेडा) येथील श्री समर्थ शिवप्रभू विद्यालयात झाले. घरची आर्थिक ओढाताण असल्याने योगेशने केवळ अभ्यासावर लक्ष केंद्रित न करता, शिक्षणाचा खर्च भागवण्यासाठी शेतात मोलमजुरीही केली. कष्टाची सवय आणि पोलीस दलात भरती होण्याचे स्वप्न उराशी बाळगून त्याने आपला सराव सुरू ठेवला होता. गावात जल्लोष आणि जंगी मिरवणूक
योगेशची पुणे पोलीस दलात निवड झाल्याचे वृत्त समजताच कढरे ग्रामस्थांनी आनंद व्यक्त केला. गावातून त्याची भव्य मिरवणूक काढण्यात आली. यावेळी तरुणांनी मोठ्या संख्येने उपस्थित राहून जल्लोष साजरा केला. ठिकठिकाणी त्याचे स्वागत आणि सत्कार करण्यात आले.
“योगेशने जिद्दीच्या जोरावर मिळवलेले हे यश इतर ग्रामीण तरुणांसाठी प्रेरणादायी आहे.” > — मयूर भामरे, सहाय्यक पोलीस निरीक्षक, निजामपूर पोलीस ठाणे. या यशाबद्दल निजामपूर पोलीस ठाण्याचे स.पो.नि. मयूर भामरे यांनी योगेशचे विशेष कौतुक करून त्याचा सत्कार केला. या आनंदाच्या प्रसंगी योगेशचे सर्व नातेवाईक, मित्रपरिवार आणि कढरे गावातील नागरिक मोठ्या संख्येने उपस्थित होते. त्याच्या या यशामुळे साक्री तालुक्यात सर्वत्र कौतुक होत आहे.
